Започнува Скопје филм фестивал со „Кругови“, 19.04.2013 (петок), 20.00 часот April 19, 2013

Проекции: 19.04.2013 (петок), 20.00 часот

Со српскиот филм „Кругови“ на режисерот Срдан Голубовиќ, денес ќе биде отворено 16-то издание на Скопје филм фестивал, со почеток во 20.00 часот во киното Милениум.
Режисерот на филмот ќе биде исто така присутен.

Скопје филм фестивал ќе се случува од 19-ти до 27-ми април, во кино Милениум и кино Рамстор. Блогот Кинотека ќе ја следи дневната програма и ќе ве информира за сите проекции.
Деталната програма е достапна на веб страницата на Скопје филм фестивал: http://www.skopjefilmfestival.com.mk/

„Кругови“

Филмот „Кругови“ се развива како триптих, истражувајќи го моралното двојство и комплексна приказна чии насоки произлегуваат од еден кобен миг.

Марко, српски војник на отсуство за време на војната, се враќа во својот роден босански град. Кога тројца негови соборци му приоѓаат на Харис, муслимански продавач, Марко интервенира, но тоа го чини живот. Дванаесет години подоцна војната е завршена, но раните остануваат отворени. Таткото на Марко ја обновува црквата кога Богдан, син на еден од убијците на Марко, се појавува во потрага по работа. Во меѓувреме, во Белград, пријател на Марко и познат хирург се двоуми дали треба да оперира еден од неговите убијци. А во Германија, Харис, сега семеен човек, се стреми да го отплати својот долг кога пристигнува вдовицата на Марко, барајќи засолниште.

Третиот филм на Срдан Голубовиќ (после „Апсолутни 100" од 2001 г. и „Стапица“ од 2007 г.) обработува повеќеслојна, но едноставна структура која ја промислува одмаздата, откупот и помирувањето.

Светската премиера на „Кругови“ беше на Санденс фестивалот во 2013 година, кадешто ја доби специјалната награда на жирито. „Кругови“ се закити и со наградата на Берлинале (Екуменско жири) и наградата од публиката на Софискиот интернационален филски фестивал.

Голубовиќ е еден од најафирмираните автори од поновата генерација во српската кинематографија. Неговиот претходен филм „Стапица“ влезе во потесниот круг на кандидати за наградата Оскар во категоријата филмови од неанглиско говорно подрачје.

„Кругови“ (Circles)
Србија / Германија / Франција / Словенија / Хрватска
113 минути / 2013 година

режија: Срдан Голубовиќ
улоги: Александар Берчек, Леон Лучев